საქართველოში გაეროს განვითარების პროგრამა (UNDP) აცხადებს სოფლად მცხოვრები ახალგაზრდების უნარების განვითარების მხარდამჭერ საგრანტო კონკურსს
კონკურსის მიზანია ქედას, ხულოს, ბორჯომის, თეთრიწყაროს, ახალქალაქის, ყაზბეგის, ლაგოდეხისა და დედოფლისწყაროს მუნიციპალიტეტებში მცხოვრები ახალგაზრდების უნარების განვითარების მხარდაჭერა და მათი დასაქმებისა და ჩართულობის ხელშეწყობა.
საგრანტო კონკურსის ფარგლებში, პრიორიტეტი მიენიჭება იმ საპროექტო განაცხადებს რომლებიც:
- ორიენტირებულია მოწყვლადი ახალგაზრდების, მათ შორის ქალების საჭიროებებზე და ფოკუსირებულია არსებული წუხილების შემსუბუქებაზე;
- დაფუძნებულია ახალგაზრდებს შორის უნარების განვითარების საჭიროების კვლევაზე და შესაბამისად ასახავს ფაქტობრივ გარემოებებს;
- მიზნად ისახავენ კონკრეტული და რეალისტური ღონისძიებების განხორციელებას იდენტიფიცირებული პრობლემის გადასაწყვეტად. შემოთავაზებული ღონისძიებები უნდა ატარებდნენ მრავალმხრივი თანამშრომლობის ხასიათს მაგალითად, კერძო და საჯარო აქტორებს შორის და შეიცავდნენ მდგრადობის ელემენტებს.
საგრანტო კონკურსში მონაწილეობის მიღება შეუძლიათ არამომგებიან (არაკომერციულ) იურიდიულ პირებს. ყველა აპლიკანტმა უნდა უზრუნველყოს თავიანთი ორგანიზაციის გამოცდილებისა და შესაბამისი უნარების დემონსტრირება, რაც შესაძლებელს გახდის სოფლის განვითარების ინიციატივების ეფექტურ რეალიზებას. მაგალითისათვის, ისეთ სფეროებში როგორებიცაა: საჭიროებების შეფასება, ბიზნესის განვითარება, ციფრული ტრანსფორმაცია, სათემო მობილიზება, სოციალურ და ეკონომიკურ განვითარებაზე ორიენტირებული აქტივობები, სოციალურ ინკლუზიაზე ორიენტირებული აქტივობები და მოწყვლადი ჯგუფებისათვის მხარდაჭერა.
წარდგენილი საგრანტო განაცხადით გაწერილი აქტივობების რეალიზების ხანგრძლიობა არ უნდა აღემატებოდეს 4 თვეს.
აპლიკანტებმა აქტივობები უნდა განახორციელონ ქედის, ხულოს, ბორჯომის, თეთრიწყაროს, ახალქალაქის, ყაზბეგის, ლაგოდეხისა და დედოფლისწყაროს მუნიციპალიტეტებში.
საგრანტო კონკურსის ფარგლებში დაფინანსდება სულ მცირე ორი საპროექტო განაცხადი. თითოეული საპროექტო განაცხადის ფარგლებში მოთხოვნილი დაფინანსების მინიმალური მოცულობა შეადგენს 20 000 ა.შ.შ. დოლარს, ხოლო მაქსიმალური ოდენობა 40 000 ა.შ.შ. დოლარს.
საგრანტო განაცხადის წარდგენის ბოლო ვადაა 2022 წლის 27 აპრილის 18:00 საათი.
დამატებითი ინფორმაციისთვის ეწვიეთ ბმულს https://procurement-notices.undp.org/view_notice.cfm?notice_id=89877
ან მიმართეთ „უმცირესობათა თემების სოციალური და ეკონომიკური უფლებების გაძლიერების ცენტრებს“ ქვემოთ მითითებულ მისამართებზე, სადაც კონკურსში მონაწილეობის მსურველებს, ცენტრის ექსპერტ-კონსულტანტები გაუწევენ დახმარებას.
ახალქალაქი: ჩარენცის ქ. #18/1
ნინოწმინდა: პუშკინის ქ. #49ა
მარნეული: გამსახურდიას ქ. #4
გარდაბანი: ლესელიძის ქ. 1 კვარტალი, 1 კორპუსი